امریکی محققین نے تیار کیا نیا اے آئی ٹول، برڈ فلو کے ممکنہ مریضوں کی تیز شناخت کرنے میں مددگار

امریکی محققین نے ایک نیا آرٹیفیشل انٹیلی جنس (اے آئی) ٹول تیار کیا ہے، جو برڈ فلو (ایچ4این1 وائرس) کے خطرے سے دوچار مریضوں کی تیز اور مؤثر شناخت کر سکتا ہے۔ اس جدید ماڈل کی خاص بات یہ ہے کہ یہ اسپتالوں کے الیکٹرانک میڈیکل ریکارڈ (ای ایم آر) میں موجود ڈاکٹرز کے نوٹس کا تجزیہ کرتا ہے اور مریضوں کے علامات کی بنیاد پر خطرے کا تعین کرتا ہے۔

یہ اے آئی سسٹم مریضوں کے عام فلو جیسی علامات جیسے کھانسی، بخار، نزلہ، ناک بند ہونا اور آنکھوں کی سرخی کو پہچاننے کے بعد یہ بھی دیکھتا ہے کہ آیا مریض حال ہی میں ایسی جگہ یا سرگرمی سے وابستہ رہا ہے جہاں برڈ فلو کا خطرہ زیادہ ہوتا ہے؟ مثال کے طور پر پولٹری فارم، مرغیوں کے درمیان کام کرنے والے مقامات یا مویشیوں والے کھیت۔ اگر خطرہ پایا جائے تو مریض کو ’ہائی رسک‘ کیس کے طور پر نشان زد کر دیا جاتا ہے۔

یہ تحقیق معروف جریدے کلینیکل انفیکشیس ڈیزیز میں شائع ہوئی ہے۔ محققین نے 2024 کے دوران امریکہ کے اسپتالوں کے 13,494 مریضوں کے ڈیٹا کا تجزیہ کیا جن میں تیز بخار، کھانسی اور آنکھوں کی سوجن جیسی علامات پائی گئی تھیں۔ اے آئی ٹول نے ان میں سے 76 مریضوں کو ممکنہ طور پر برڈ فلو کے خطرے سے دوچار قرار دیا۔ مزید جانچ کے بعد معلوم ہوا کہ 14 مریض حال ہی میں مرغیوں، جنگلی پرندوں یا مویشیوں کے قریب رہے تھے۔

اس پورے عمل میں محض 26 منٹ لگے اور فی مریض لاگت صرف 3 سینٹ (تقریباً ڈھائی روپے) آئی۔ اس سے ظاہر ہوتا ہے کہ یہ ٹیکنالوجی نہ صرف وقت اور محنت بچاتی ہے بلکہ بڑے پیمانے پر مریضوں کی جانچ کے دوران درست نتائج بھی فراہم کرتی ہے۔

میری لینڈ اسکول آف میڈیسن کی ماہر وبائیات اور معاون پروفیسر کیتھرین ای. گُڈمین نے کہا، ’’یہ تحقیق واضح کرتی ہے کہ جنریٹیو اے آئی ہمارے عوامی صحت کے نظام میں موجود ایک بڑی کمی کو پُر کر سکتا ہے۔ یہ ان ہائی رسک مریضوں کو سامنے لاتا ہے جو اکثر نظر انداز ہو جاتے ہیں۔‘‘

انہوں نے مزید کہا کہ چونکہ ایچ4این1 وائرس جانوروں میں مسلسل پھیل رہا ہے، اصل خطرہ یہی ہے کہ ہم نہیں جانتے کہ کون مریض کب اس کے رابطے میں آیا ہے۔ چونکہ اس وقت یہ ٹریک نہیں کیا جا رہا کہ کتنے مریض ممکنہ طور پر وائرس کے شکار ہیں یا ان کا ٹیسٹ ہو رہا ہے، اس لیے کئی کیسز کی نشاندہی نہیں ہو پاتی۔ یہی وجہ ہے کہ صحت کے نظام کے لیے یہ نہایت ضروری ہے کہ ایسے مریضوں کی نگرانی ہو اور بروقت ایکشن لیا جائے۔

ماہرین کا کہنا ہے کہ اس ٹول کے ذریعے مستقبل میں ایک ایسا قومی نیٹ ورک بنایا جا سکتا ہے جو نہ صرف بَرڈ فلو بلکہ دیگر نئی متعدی بیماریوں پر بھی نظر رکھ سکے۔ اس طرح وبا پھیلنے سے پہلے ہی الرٹ جاری کر کے ہزاروں جانیں بچائی جا سکتی ہیں۔

from Qaumi Awaz https://ift.tt/0H3l6vg

ہندوستان کی ’ویدر وومین‘ انا منی، جنہیں فزکس نہ ملا تو موسمیات میں انقلاب برپا کر دیا!

ریاستِ تروانکور (موجودہ کیرالہ) میں 23 اگست 1918 کو پیدا ہونے والی انا منی کا شمار ان خواتین سائنس دانوں میں ہوتا ہے جنہوں نے اپنے وژن اور انتھک محنت سے ملک کا سر فخر سے بلند کیا۔ آج ہندوستان کا شمار ان چند ممالک میں ہوتا ہے جو دنیا کو درست اور فوری موسم کی پیش گوئی فراہم کرتے ہیں۔ یہ کارنامہ برسوں کی تحقیق اور کوششوں کا نتیجہ ہے جس میں انا منی کا کردار نمایاں ہے۔ انہیں بجا طور پر ’ویدر وومین آف انڈیا‘ کہا جاتا ہے۔

بچپن ہی سے انا منی کو کتابوں سے خاص شغف تھا۔ محض بارہ برس کی عمر تک وہ اپنے علاقے کے پبلک لائبریری کی تقریباً تمام کتابیں پڑھ چکی تھیں۔ ہائی اسکول کے بعد انہوں نے ویمنز کرسچن کالج سے انٹرمیڈیٹ سائنس اور پھر مدراس کے پریسیڈنسی کالج سے فزکس اور کیمسٹری میں آنرز کے ساتھ بی ایس سی مکمل کی۔ دلچسپ بات یہ ہے کہ ان کا اصل خواب میڈیکل کی تعلیم حاصل کرنا تھا لیکن حالات نے رخ بدلا اور وہ فزکس میں آ گئیں، جس میں وہ غیر معمولی صلاحیت رکھتی تھیں۔

انا منی کو 1940 میں گریجویشن مکمل کرنے کے بعد انڈین انسٹی ٹیوٹ آف سائنس، بنگلور میں اسکالرشپ ملی، جہاں انہوں نے نوبل انعام یافتہ سائنس داں سی وی رمن کی نگرانی میں ہیروں کی خصوصیات پر تحقیق کی اور پانچ برس تک دن رات تجربہ گاہ میں کام کیا۔ اس انتھک محنت کے باوجود انہیں وہ پی ایچ ڈی ڈگری نہیں دی گئی جس کی وہ حقدار تھیں کیونکہ اس وقت یونیورسٹی آف مدراس نے یہ شرط لگائی کہ ان کے پاس ایم ایس سی کی ڈگری نہیں ہے۔ مگر انا منی نے اس محرومی کو کبھی دل پر نہیں لیا اور کہا کہ ڈگری نہ ملنے سے ان کی زندگی اور کام پر کوئی اثر نہیں پڑا۔

بعد ازاں انہیں برطانیہ میں اعلیٰ تعلیم کے لیے اسکالرشپ ملی۔ جب وہ لندن پہنچیں تو معلوم ہوا کہ یہ اسکالرشپ فزکس کے بجائے موسمیاتی آلات کے مطالعے کے لیے ہے۔ انہوں نے اس چیلنج کو قبول کیا اور یہی فیصلہ ان کے کیریئر کا نیا موڑ ثابت ہوا۔ لندن کے امپیریل کالج میں انہوں نے موسمیاتی آلات کی تیاری اور تحقیق میں مہارت حاصل کی۔

انا منی نے 1948 میں وطن واپسی کے بعد پونے میں انڈین میٹیرولوجیکل ڈیپارٹمنٹ (ہندوستانی محکمہ موسمیات) میں شمولیت اختیار کی۔ یہاں انہوں نے تقریباً تین دہائیوں تک کام کیا اور درجنوں سائنسی تحقیقی مقالے شائع کیے۔ ان کا سب سے اہم کارنامہ شعاعی اور فضائی اوزون کی پیمائش کے آلات تیار کرنا تھا۔ انہوں نے اوزون سونڈ نامی آلہ بنایا جو اوزون کی مقدار ناپنے کے لیے استعمال ہوتا ہے۔

انہی کی کوششوں سے ہندوستان میں موسمی آلات کے قومی معیار قائم ہوئے اور عالمی سطح پر ان آلات کا موازنہ ممکن ہوا۔ ان کے کام نے ملک میں موسم کی پیش گوئی کو سائنسی بنیادوں پر استوار کیا اور کسانوں سے لے کر عام شہری تک سب کے لیے اس کا فائدہ ہوا۔

1976 میں انا منی محکمہ موسمیات کی ڈپٹی ڈائریکٹر جنرل کے عہدے سے ریٹائر ہوئیں۔ ریٹائرمنٹ کے بعد بھی تحقیق سے رشتہ نہ ٹوٹا اور وہ تین برس تک رمن ریسرچ انسٹی ٹیوٹ میں وزیٹنگ پروفیسر کے طور پر خدمات انجام دیتی رہیں۔

ان کی زندگی اس بات کی روشن مثال ہے کہ عزم، مطالعہ اور محنت کے بل بوتے پر کس طرح رکاوٹوں کو مواقع میں بدلا جا سکتا ہے۔ 2001 میں ترواننت پورم (کیرالہ) میں ان کا انتقال ہوا لیکن ان کا سائنسی ورثہ آج بھی ہندوستانی موسمیات کی بنیادوں کو مضبوط کیے ہوئے ہے۔

انا منی کی کہانی صرف ایک سائنس داں کی نہیں بلکہ اس خواب کی ہے جو خواتین کو سائنس اور تحقیق کے میدان میں آگے بڑھنے کا حوصلہ دیتا ہے۔ ان کی زندگی ہمیں یہ سبق دیتی ہے کہ حالات چاہے جیسے بھی ہوں، لگن اور علم سے راستے نکالے جا سکتے ہیں۔

(مآخذ: آئی اے این ایس)

from Qaumi Awaz https://ift.tt/L9Hh0GV