ہندوستان میں گوگل والیٹ لانچ، صارفین کو ایک ہی مقام پر حاصل ہوں گی سہولیات

نئی دہلی: گوگل کی جانب سے بدھ کو گوگل والیٹ ایپ لانچ کی گئی ہے۔ اس ایپ کے ذریعے لوگ ڈیجیٹل دستاویزات جیسے بورڈنگ پاس، لائلٹی کارڈ، مووی ٹکٹ وغیرہ سہولیات ایک جگہ پر آسانی سے حاصل کر سکتے ہیں۔ گوگل والیٹ ہندوستان میں گوگل پے سے بالکل مختلف ایپ ہے۔ اس کے لانچ ہونے کے بعد بھی گوگل پے کی خدمات پہلے کی طرح جاری رہیں گی۔

گوگل نے کہا کہ کمپنی نے گوگل والیٹ کے تجربے کو بہتر بنانے کے لیے پی وی آر، آئیناکس، ایئر انڈیا، انڈیگو، فلپکارڈ، پائن لیبز، کوچی میٹرو، ابھی بس اور دیگر کمپنیوں کے ساتھ شراکت داری کی ہے۔ مستقبل میں کمپنی اس سے مزید پارٹنرز کو منسلک کرے گی۔

گوگل میں اینڈرائیڈ کے جی ایم اور انڈیا انجینئرنگ کے سربراہ رام پاپاٹلا نے کہا کہ گوگل والیٹ اینڈرائیڈ انڈیا کی تاریخ میں ایک اہم کامیابی ہے۔ یہ روزمرہ کی ضروریات کی چیزوں کو ایک جگہ پر لا کر لوگوں کی زندگی کو آسان بنائے گا۔ اس کے لیے ہم نے ہندوستان کے اعلیٰ برانڈز کے ساتھ شراکت داری کی ہے۔ اس کی مدد سے صارفین باآسانی لائلٹی کارڈز، ایونٹ ٹکٹ، ٹرانسپورٹ پاس اور دیگر روزمرہ کی ضروریات تک رسائی حاصل کر سکتے ہیں۔

گوگل والیٹ جی میل کے ساتھ بھی لنک ہوگا۔ گوگل کی طرف سے دی گئی معلومات کے مطابق، اگر کوئی شخص کسی فلم، آئی پی ایل، ایونٹ وغیرہ کے ٹکٹ بک کرتا ہے اور اس نے گوگل کی پرسنلائز سیٹنگ کو آن کر رکھا ہے، تو اس کا ٹکٹ خود بخود گوگل والیٹ پر نظر آنا شروع ہو جائے گا۔

گوگل نے کہا کہ ہماری دیگر مصنوعات کی طرح گوگل والیٹ بھی مکمل طور پر محفوظ ہے۔ اس میں پرائیویسی کا مکمل خیال رکھا گیا ہے اور صارف کو اس بات پر مکمل کنٹرول حاصل ہوگا کہ وہ کون سی معلومات محفوظ کرنا چاہتا ہے اور اسے کیسے استعمال کرنا چاہیے۔ صارفین گوگل پلے اسٹور سے گوگل والیٹ کو آسانی سے ڈاؤن لوڈ کر سکتے ہیں۔

from Qaumi Awaz https://ift.tt/Zi8AldB