چندریان-3: کیا لینڈر اور رووَر پھر ہوگا فعال؟ چاند پر ہو رہا سورج کا طلوع

ویسے تو چندریان-3 مشن کامیابی کے ساتھ پورا ہو چکا ہے، لیکن امید ظاہر کی جا رہی ہے کہ یہ مشن مزید آگے بڑھ سکتا ہے۔ ایسا ممکن ہو پائے گا اگر سلیپ موڈ میں ڈالا گیا وکرم لینڈر اور پرگیان رووَر آئندہ 23 ستمبر کو ایک بار پھر فعال ہو جائے۔ اِسرو سے جڑے خلائی سائنسدانوں کا کہنا ہے کہ چندریان-3 کا لینڈر ماڈیول ایک بار پھر فعال ہو سکتا ہے، اور اگر ایسا ہوا تو یہ چاند مشن میں ایک بہت بڑی کامیابی ہوگی۔ ایسا ہونے پر چاند کے جنوبی قطب پر مزید تحقیقی عمل انجام دیے جا سکیں گے۔

اِسرو کے اسپیس ایپلی کیشن سنٹر کے ڈائریکٹر نلیش دیسائی نے بتایا کہ گزشتہ 3 ستمبر کو چاند کے جنوبی قطب پر رات ہونے کے سبب چندریان-3 کے لینڈر وکرم اور رووَر پرگیان کو سلیپ موڈ میں ڈال دیا گیا تھا۔ ان دونوں پر سولر پینل لگائے گئے ہیں اور چاند کے جنوبی قطب پر جب دن نکلے گا تو یہ پینل ریچارج ہو سکتے ہیں۔ نلیش نے بتایا کہ ’’ہمارے منصوبہ کے مطابق 23 ستمبر کو لینڈر وکرم اور رووَر از سر نو فعال ہو سکتے ہیں۔ چاند پر اب دن نکلنا شروع ہو گیا ہے۔ حالانکہ یہ دیکھنے والی بات ہوگی کہ رات کے دوران جب چاند کی سطح پر درجہ حرارت منفی 120 ڈگری سلسیس سے منفی 200 ڈگری سلسیس تک گر جاتا ہے تو کیا سولر پینل پھر سے ٹھیک طرح کام کر پائیں گے یا نہیں۔‘‘

#WATCH | On Chandrayaan 3, Space Application Centre, ISRO Director Nilesh Desai says, "On September 3 we kept both lander and rover in the sleep mode...Solar panels present on the lander and rover will get recharged. According to our plan on September 23, it will be revived. At… pic.twitter.com/705ktygl7m

— ANI (@ANI) September 21, 2023

نلیش دیسائی کا کہنا ہے کہ ہم اس کی امید کر رہے ہیں کہ لینڈر پر موجود چار سنسرز اور رووَر پر موجود دو سنسرز میں سے کچھ دوبارہ کام کرنا شروع کر سکتے ہیں۔ اگر ایسا ہوتا ہے تو ہم آگے بھی چاند پر نئے تجربات کر پائیں گے۔

قابل ذکر ہے کہ چاند پر زمین کے 14 دنوں کے برابر دن اور رات ہوتے ہیں۔ جب چندریان-3 کا لینڈر چاند پر اترا تھا تو اس وقت چاند پر دن نکل رہا تھا۔ یہی وجہ رہی کہ 14 دنوں تک کام کرنے کے بعد لینڈر اور رووَر سلیپ موڈ میں چلے گئے تھے۔ 14 دنوں تک لینڈر ماڈیول نے بہت اچھا کام کیا اور کافی ڈاٹا اِسرو نے جمع کر لیے ہیں۔ خلائی سائنسداں ڈاکٹر آر سی کپور سے جب لینڈر اور رووَر کے پھر سے فعال ہونے کو لے کر سوال کیا گیا تو انھوں نے کہا کہ ’’لینڈر اور رووَر اپنا کام کر چکے ہیں۔ جب دونوں کو سلیپ موڈ میں ڈالا گیا تو دونوں کے سبھی پارٹس صحیح طریقے سے کام کر رہے تھے۔ اِسرو کے پاس پہلے سے ہی کافی ڈاٹا اکٹھا ہو گیا ہے۔‘‘ انھوں نے مزید کہا کہ ’’ہو سکتا ہے میشنیں پہلے جیسی کنڈیشن میں پھر سے کام نہ کر سکیں، لیکن پھر بھی کچھ امید باقی ہے۔ ہو سکتا ہے کہ ہمیں اچھی خبر مل جائے۔ چاند پر دن نکلنا شروع ہو گیا ہے۔ رووَر کو پہلے سے ہی اس طرح سے رکھا گیا ہے کہ جب سورج نکلے تو اس کی روشنی سیدھے رووَر کے سولر پینلز پر پڑے۔‘‘

from Qaumi Awaz https://ift.tt/3Jd5XbM